समृद्धिको आधार जलविद्युत आयोजना मात्रै होइन : सांसद तामाङ

काठमाडौं भाद्र १५, नेकपा माओवादी केन्द्रकी सांसद मिना तामाङले मुलुक समृद्धिको आधार जलविद्युत आयोजना मात्रै नभएको बताएकी छन् ।
कृषि सहकारी तथा प्राकृतिक स्रोत समितिको आइतबार बसेको बैठकमा भएको हाईड्रोपावरहरुको वातावरणीय प्रभाव मूल्याङ्कन प्रतिवेदनको वातावरणीय व्यवस्थापन योजना परिमार्जन (ईएमपी अपडेट) गर्ने विषयमा देखिएका समस्या सम्बन्धी छलफलमा उनले यस्तो बताएकी हुन् ।
हाल मानिसको दिमागमा समृद्धिको आधार भन्ने वित्तिकै जलविद्युत र ढुङ्गा खानी आउने गरेको उनको भनाई छ । उनले समृद्धिको आधार भनेको उद्योग, कलकारखानाहरुको स्थापना र सञ्चालन पनि रहेको बताइन् ।
जुट मिल, जनकपुर कारखानालगायत बन्द रहेका थुप्रै कारखानाहरूलाई सञ्चालनमा ल्याउन कुरामा कसैको ध्यान नगएको उनको भनाई छ ।
उनले जलविद्युत आयोजना, हावा, पानी, वन, जंगल, जडिबुटी भनेको राष्ट्रको धन भएकोले यसलाई कसरी सञ्चालन गर्ने भन्ने जिम्मा राज्यले लिनुपर्ने बताइन् ।
यस्ता चिजहरूमा निजी कम्पनीहरूको सहभागिता कतिसम्म गराउने हो भन्नेमा ध्यान दिनुपर्नेमा उनले जोड दिइन् ।
उनले भनिन्,‘समृद्धिको आधार भनेको हिजो जतिपनि जुट मिलदेखि लिएर जनकपूर कारखानादेखि लिएर थुप्रै कारखानाहरू आज बन्द भइरहेको छ । त्यो बन्द भएको कारखाना चाहिँ बेवारिसे छ । त्यो कारखाना, उद्योगहरू चाहिँ बेवारिसे छ, अहिलेसम्म त्यसलाई हामीले फेरि सञ्चालनमा ल्याउने भन्ने कुरामा चाहिँ हाम्रो ध्यान पुगेको छैन । तर अहिले सबै जनाको एउटा नजरमा दिमागमा के आइरहेको छ भने हाईड्रोपावर, ढुङ्गा खानी । सायद मलाई लाग्छ, यो हाईड्रोपावर भनेको हावा, पानी, वन, जंगल, जडिबुटी भनेको त राष्ट्रको धन हो नि । त्यो राष्ट्रको धनलाई कसरी सञ्चालन गर्ने र यो राज्यको अधीनमा छ कि छैन । यहाँ थुप्रै कम्पनीहरूमा प्रतिष्पर्धा छ । यति प्रतिष्पर्धा छ की हाम्रो मुख्य चीजहरूमा प्रतिस्पर्धी ढङ्गले आइराखेको छ । आउन त आएको छ तर दिँदाखेरि कतिसम्म दिने, कहाँसम्म दिने, कुन कुन कुरालाई दिने भन्ने कुरालाई अलिकति मध्यनजर गर्नुपर्छ ।’
उनले हाल निकुञ्ज तथा संरक्षण क्षेत्रमा जलविद्युत निर्माणमा वन मन्त्रालयले अवरोध सिर्जना गरेको नभई कानुनले गरेको बताइन् ।
यसको निकासको लागी कानुन संशोधन गर्न राष्ट्रियस्तरमा नै छलफल गर्नुपर्नेमा उनले जोड दिइन् ।