युवा किसान काठमाडौं घोषणपत्र–२०८२ जारीः राजनीतिक क्रान्ति सम्पन्न, आर्थिक क्रान्ति बाँकी : चित्रबहादुर श्रेष्ठ

काठमाडौं साउन ७, राष्ट्रिय युवा किसान सञ्जाल नेपालले ‘युवा किसान समिति घोषणा २०८२’ जारी गरेको छ । साउन ५ गतेदेखि ७ गतेसम्म काठमाडौँमा सम्पन्न ‘प्रथम राष्ट्रिय युवा किसान मञ्चः युवा किसान क्याम्प तथा एग्रिलम्पिक्स’ ले १२ बुँदे घोषणापत्र जारी गरेको हो ।
बुधबार संवाद डबलीमा पत्रकार सम्मेलनमार्फत सार्वजनिक गरिएको घोषणापत्रमा कृषि पेसालाई व्यवसायीकरण, वैज्ञानिकरण, सहकारीकरण र औद्योगिकीकरणमार्फत कृषि क्षेत्रको समग्र विकास, किसानको हक, हित र अधिकारीको सुनिश्चितता, किसानको शोषण गर्ने नवउदारवादी नीति, किसानमारा बहुर्राष्ट्रिय निगमहरु र कृषि क्षेत्रमा भएको वैदेशिक हस्तक्षेपको विरोध, किसानहरुको सूचीकरण तथा वर्गीकरणसहित ‘किसान परिचयपत्र’ उपलब्ध, जलवायु परिवर्तनका सिर्जित समस्याहरु, कृषि रसायनहरुको नियन्त्रण, स्थानीय तथा रैथाने ज्ञान सीपको उच्च प्रयोग किसानहरुको एकता र अग्रगनको पक्षमा दृढ प्रतिवद्धतालगायतका विषय समेटिएका छन् ।
राष्ट्रिय किसान सञ्जाल नेपाल, राष्ट्रिय कार्यान्वयन समितिले आयोजना गरेको एग्रिलम्पिक्सले जारी गरेको घोषणापत्र सार्वजनिक गर्दै किसान नेताहरुले ‘राजनीतिक क्रान्ति सम्पन्न भएको, अब आर्थिक क्रान्ति गर्न बाँकी रहेको बताएका छन् ।
कार्यक्रममा अखिल नेपाल किसान महासंघ (क्रान्तिकारी केन्द्र)का अध्यक्ष तथा राष्ट्रिय किसान आयोगका प्रथम अध्यक्ष चित्रबहादुर श्रेष्ठले युवाहरुले राखेको विचार नेपाली समाज रुपान्तरणका लागि उपयुक्त हुने बताए । श्रेष्ठले बाँकी परिवर्तन युवाहरुको काँधमा आएको बताउँदै किसान आन्दोलन उत्तराधिकारीको निर्माण नहुँदा धेरै आन्दोलनहरु दिगो हुन नसकेको बताए । उनले विगतको इतिहास पनि त्यस्तै हुदै आएकोले अबको आन्दोलन त्यस्तो हुनु नहुने बताउँदै बाँकी नेपालको जमीन हराभरा बनाएर कृषिको माध्यमबाट आर्थिक क्रान्तिलाई माथि उठाउने अभिभारा पनि युवाहरुमा रहेको श्रेष्ठले बताए ।
त्यसैगरि अखिल नेपाल किसान महासंघ (क्रान्तिकारी केन्द्र)का महासचिव, राष्ट्रिय भूमि आयोगका पूर्वउपाध्यक्ष राष्ट्रिय किसान सञ्जालका संयोजका नहेन्द्र खड्काले किसान संगठनहरु विगतमा अलग–अलग रहेर आन्दोलनहरु गरेको भएपनि कसैले नसुनेको बताउँदै अब साझा आवाज बलियो भएको बताउनु भयो । सरकारले किसानको कुरा सुनेन । एकतावद्ध नभएसम्म किसानको अधिकार पाउन सक्दैन । नेपालको सबैभन्दा ठूलो समस्या कृषि क्षेत्रको रहेको बताउँदै विषयवस्तुलाई पहिचान गर्न सकेनौ भने कृषि क्रान्ति अगाडि नबढ्ने बताउनु भयो ।
फिलिपिन्समा गएका युवाहरुको तर्फबाट राष्ट्रिय कृषि सहकारी संघका युवा नेता सुन्दर नेपालले आफूहरुले फिपिपन्सिमा गएर गरिएको प्रतिवद्धतालाई कार्यन्वयन गर्ने प्रयास स्वरुप आजको यो मञ्चले पूर्णता पाएको बताए । अखिल नेपाल किसान महासंघका सचिव शर्मिला पौडेलले युवाहरु भूमिमा जोडिन खोज्न अति महत्वपूर्ण भएको बताईन् ।
कार्यक्रममा अखिल नेपालन किसान महासंघ (अप्फा)का नेता रामप्रसाद भुसालले ८० लाख नेपाली युवाहरुलाई नेपाल फर्काउने जिम्मेवारी युवाहरुको भएको बताए । भुसालले आज गठित युवा किसान मञ्चले जनताको हितको लागि काम गर्ने विश्वास भएको बताउँदै आउने क्रान्तिहरु पूरा गर्ने जिम्मेवारी पनि युवाहरुको काँधमा आएको बताए ।
अखिल नेपाल किसान महासंघ (क्रान्तिकारी केन्द्र) उप–महासचिव तथा युवा किसान मञ्चका अध्यक्ष निर्दोष तिमिल्सिनाले नेपालको कृषिलाई नविनतम् ढंगले अगाडि बढाउने जिम्मेवारी दिएकोमा आफूहरु प्रतिवद्धता भएर लाग्ने विचार व्यक्त गरेको छ ।
कार्यक्रममा केन्द्रीय चिया सहकारी संघको युवा नेता तथा युवा किसान मञ्च सदस्य बुद्ध नेम्वहाङ्ग काठमाडौं घोषणा पत्र पढेर सुनाएका थिए । कार्यक्रमको सञ्चालक युवा किसान मञ्चका सह–संयोजक लक्ष्मण गुरुङले गरेका थिए ।
काठमाडौँको कीर्तिपुरमा सम्पन्न एग्रिलम्पिक्समा सातवटै प्रदेशका युवा किसानको सहभागिता रहेको थियो ।

             ऐतिहासिक प्रथम राष्ट्रिय युवा किसान मञ्चः युवा किसान क्याम्प तथा एग्रिलम्पिक्सद्वारा अनुमोदित
                                           युवा किसान काठमाडौं घोषणापत्र – २०८२

                              २०८२ साउन ७ गते (२०२५ व्गथि २३) काठमाडौं, नेपाल
कृषिप्रधान देश नेपालको अर्थतन्त्रको मेरुदण्डको रूपमा रहेको कृषि क्षेत्रमा युवाहरूको कृषि उत्पादनदेखि राज्यको नीति निर्माण तहसम्म प्रत्यक्ष सहभागिता अत्यावश्यक छ भने युवाहरूलाई कृषि क्षेत्रमा नयाँ प्रविधि र सिपसहित स्थापित गर्नुपर्ने आवश्यकता पनि छ । यही परिप्रेक्ष्यमा राष्ट्रिय किसान सञ्जाल नेपाल, राष्ट्रिय कार्यान्वयन समितिद्वारा काठमाडौंको कीर्तिपुरमा २०८२ साउन ५–७ गते –२०२५ व्गथि २१–१३) सम्म सम्पन्न प्रथम राष्ट्रिय युवा किसान मञ्चः युवा किसान क्याम्प तथा एग्रिलम्पिक्स देशका सातवटै प्रदेशका युवा किसानहरूको सक्रिय तथा उत्साहजनक सहभागितामा ऐतिहासिक र भव्य रूपले सम्पन्न भयो । नेपालस्थित संयुक्त राष्ट्रसंघीय निकायहरूको समुपस्थितिमा संघीय संसदको राष्ट्रिय सभाका सम्माननीय अध्यक्ष नारायणप्रसाद दाहालद्वारा समुद्घाटन भई काठमाडौंमा तीन दिनसम्म सञ्चालित प्रथम राष्ट्रिय युवा किसान मञ्चः युवा किसान क्याम्प तथा एग्रिलम्पिक्समा नेपाली कृषिका संभावना र चुनौतिहरू, कृषिमा युवाहरूको सहभागिता र उनीहरूले सामना गरिरहेका समस्याहरू, विभिन्न सरकारी निकायहरू, तिनका संरचनाहरू तथा कार्यक्रमहरू, तिनले किसानहरू, विशेष गरी युवा किसानहरूलाई दिने सेवा–सुविधाहरू, लगायतका विभिन्न पक्षमा बहुआयामिक ढंगले विस्तृतरूपमा छलफल र अन्तक्र्रिया गरियो । कार्यक्रमको पूर्वसन्ध्यामा देशका सात वटै प्रदेशहरूमा ‘कृषिमा युवाः सम्भावना र चुनौंती विषयक प्रदेशस्तरीय युवा किसान अन्तक्र्रिया (अनलाइन) आयोजना गरिएको थियो भने विभिन्न रोचक खेलहरू, प्रतियोगितात्मक तस्विर प्रदर्शनी, कृषि उत्पादन तथा ज्ञान सामग्रीहरूको प्रदर्शनी गरिएको थियो । मञ्चबाट निर्दोष तिमिल्सिना संयोजक, लक्ष्मण गुरुङ सहसंयोजक र थप किसान १९ जना सदस्य रहने गरी राष्ट्रिय किसान सञ्जाल, युवा किसान समिति गठन भयो । यस प्रथम राष्ट्रिय युवा मञ्चः युवा किसान क्याम्प तथा एग्रिलम्पिक्समा सहभागी हामी युवा किसानहरूले नेपाली किसानहरूको हक, हित, अधिकार, खाद्यसम्प्रभुता, क्रान्तिकारी÷वैज्ञानिक भूमिसुधार, जलवायु न्याय र कृषि क्रान्तिको पक्षमा दृढ रहँदै निम्न प्रतिवद्धताहरू व्यक्त गर्दछौं ।
हाम्रा प्रतिवद्धताहरू
१. हामी कृषि पेसालाई व्यावसायीकरण, वैज्ञानिकरण, आधुनिकीकरण, सहकारीकरण र औद्योगिकीकरणमार्फत कृषि क्षेत्रको समग्र विकास, किसानहरूका हक, हित र अधिकार सुनिश्चित गर्दै खाद्यसम्प्रभुता, क्रान्तिकारी÷वैज्ञानिक भूमिसुधार, जलवायू न्याय, लैंगिक समानता, समावेशीकरण र सामाजिक न्यायसहितको कृषि क्रान्तिको पक्षमा दृढ रूपमा प्रतिवद्ध छौं ।
२. हामी किसानहरूको शोषण गर्ने नवउदारवादी नीतिहरू, किसानमारा बहुराष्ट्रिय निगमहरू र कृषि क्षेत्रमा भएको वैदेशिक हस्तक्षेपको विरोध गर्दै कृषि पेसालाई आकर्षक, मर्यादित र प्रतिफलमुखी पेसाको रूपमा विकास गर्न, किसानको जीवनमा समृद्धि र खुसीयाली ल्याउँदै कृषि पेसामा नौजवान युवाहरूको आकर्षण बढाउन, कृषि क्षेत्रको उत्पादन र उत्पादकत्व वृद्धिसहित आत्मनिर्भर कृषिको विकासद्वारा राष्ट्रिय आत्मनिर्भर अर्थतन्त्रको विकास गर्दै समाजवादको आधार तयार गर्न प्रतिवद्ध छौं ।
३. हामी कृषिमा युवाहरूलाई आकर्षित, संरक्षित, संगठित, प्रशिक्षित र सबलीकरण गर्दै उनीहरूको जीवनमा खुसियाली र समृद्धि ल्याउन आवश्यक नीति तथा कार्यक्रमहरू जारी गरी कार्यान्वयन गर्न देशका तीनै तहका सरकारहरू र अन्य सरोकारवाला निकायहरूसँग राष्ट्रिय किसान सञ्जाल, राष्ट्रिय कार्यान्वयन समितिमार्फत् आवश्यक समन्वय, सहजीकरण र सहकार्य गर्नेछौं ।
४. हामी आफू आबद्ध किसान संघ–संस्थाहरूमा युवा किसानहरूलाई संगठित, प्रशिक्षित र परिचालित गर्नेछौं । त्यसका लागि महासंघको संरचनामा भएका किसान संघ–संस्थाहरूले युवा किसान संगठनहरू गठन गर्ने र संघको संरचनामा भएका किसान संघ–संस्थाहरूले युवा किसान विभाग गठन गरी संस्थागत रूपमा युवाहरूलाई संगठित, प्रशिक्षित र प्रोत्साहित गर्नेछौं ।
५. हामी युवा किसानहरूका ज्ञान, सिप र अनुभवहरूलाई दस्तावेजीकरण गर्दै तीनै तहका सरकारहरूबाट युवा किसान लक्षित कार्यक्रमहरू तर्जुमा र सञ्चालन गर्नका आवश्यक समन्वय, सहजीकरण र नीतिगत पैरवी गर्नेछौं र आवश्यक परे संयुक्त संघर्ष गर्नेछौं ।
६. हामी किसानहरूको सूचीकरण तथा वर्गीकरणसहित किसान परिचयपत्र उपलब्ध गराई सोही आधारमा किसानहरूलाई आवश्यक प्रसार सेवा, तालिम, प्रशिक्षण, अनुदान, बाली तथा पशुपन्छी बिमा, कृषि ऋण, सरकारी छुट लगायतका सेवा सुविधा प्रदान गर्न नेपाल सरकारसँग माग गर्दै त्यसका लागि पैरवी र आवश्यक परे संघर्ष गर्ने प्रतिबद्धता जाहेर गर्दछौं ।
७. हामी जलवायु परिवर्तनका सिर्जित समस्याहरू र पर्यावरणीय संकटसँग जुध्दै कृषिको उत्पादन र उत्पादकत्व वृद्धिका लागि आवश्यक पर्ने नयाँ सिप, ज्ञान र प्रविधिको विकासका लागि प्रतिबद्ध रहँदै राज्य र अन्य निकायहरूसँग आवश्यक सहकार्य र समन्वय गर्नेछौं । जलवायू न्याय र जलवायू वित्तमा किसानहरू, विशेष गरी युवा किसानहरूको पहुँचका लागि निरन्तर पैरवी र संघर्ष गरिरहने छौं ।
८. हामी कृषिमा भइरहेको कृषि रसायनहरूको अनियन्त्रित प्रयोगले मानव स्वास्थ्य र पर्यावरणमा पारेका प्रतिकूल प्रभावबारे जनचेतना फैलाउँदै जैविक विविधतामा आधारित पर्यावरणीय कृषिको पक्षमा आवश्यक बहस, पैरवी र क्षमता अभिवृद्धि गर्दै देशलाई रासायनिक मल र विषादिमुक्त क्षेत्र घोषणा गर्ने दिशाउन्मुख रही कार्य गर्ने प्रतिवद्धता जाहेर गर्दछौं ।
९. किसान संघ, संगठन, राजनीतक दलहरू र राज्यका नीति निर्माण गर्ने तहमा किसानहरू र त्यसमा पनि युवा किसानहरूको सहभागिताका लागि आवश्यक पहल र पैरवी गर्नेछौं ।
१०. हामी जैविक विविधता, पर्यावरणीय कृषि, स्थानीय तथा रैथाने ज्ञान–सिपको उच्च प्रयोग गर्दै आत्मनिर्भर कृषि र स्वाधीन राष्ट्रिय अर्थतन्त्र निर्माण गर्न प्रतिबद्ध छौं ।
११. हामी भूमिहीनता, गरिबी, अशिक्षा, भोकमरी, रूढिवादी अन्धविश्वास, जातीय विभेद, लैङ्गिक विभेद र वर्गीय उत्पीडनको अन्त्यका लागि प्रतिबद्ध रहँदै सामाजिक न्याय, समानता र स्वतन्त्रतासहितको समाजवादी समृद्ध नेपाल निर्माणको दिशामा निरन्तर लागिरहन प्रतिबद्ध छौं ।
१२. हामी युवा किसानहरू देशभरका उत्पादक किसानहरूको एकता र अग्रगमनको पक्षमा दृढ प्रतिवद्धता व्यक्त गर्दै संसारभरका किसानहरूको वर्गीय मुक्ति संघर्षमा ऐक्यबद्धता प्रकट गर्दछौं ।

राष्ट्रिय किसान सञ्जाल, युवा किसान समिति
राष्ट्रिय किसान सञ्जाल नेपाल, राष्ट्रिय कार्यान्वयन समितिद्वारा काठमाडौंको कीर्तिपुरमा २०८२ साउन ५–७ गते (२०२५ July २१–१३) सम्म देशका सातवटै प्रदेशका युवा किसानहरूको सक्रिय तथा उत्साहजनक सहभागितामा ऐतिहासिक र भव्य रूपले सम्पन्न प्रथम राष्ट्रिय युवा किसान मञ्चः युवा किसान क्याम्प तथा एग्रिलम्पिक्स -First National Youth Peasant ForumM Young Farmers Camp and Agrilympics–YFCA-२०२५) श्री निर्दोष तिमिल्सिना संयोजक, श्री लक्ष्मण गुरुङ सहसंयोजक र थप १९ जना सदस्य रहने गरी राष्ट्रिय किसान सञ्जाल, युवा किसान समिति गठन भयो । समितिको नामावली निम्नानुसार रहेको छः
१. संयोजकः श्री निर्दोष तिमिल्सिना,
२. सहसंयोजकः श्री लक्ष्मण गुरुङ
३. सदस्यः ओम आचार्य
४. सदस्यहरु ः मञ्जु सापकोटा
५. सदस्यः सुपेन्द्र राई
६. सदस्यः रामचन्द्र नेपाल
७. सदस्यः प्रज्ज्वल थापा
८. सदस्यः तेजमान श्रेष्ठ
९. सदस्यः पार्वती कँडेल
१०. सदस्यः सम्झना परियार
११.सदस्यः सुन्दर नेपाल
१२. सदस्यः बुद्धहाङ नेम्वाङ
१३. सदस्यः मदन भुसाल
१४. सदस्यः वविता धमला
१५. सदस्यः ……..
बाँकी सदस्यहरू राष्ट्रिय किसान सञ्जालका सदस्य संगठनहरूबाट आएपछि थप गरिनेछ ।