काठमाडौं भाद्र १६, भोटेकोशी नदीमा आएको भीषण बाढीबाट प्रभावित नागरिकका लागि कृषि वन तथा पर्यावरण मन्त्री गिता चौधरीको पहलमा १६ हजार ६ सय किलो तरकारी पठाइएको छ ।
मन्त्री चौधरीको निर्देशन कालीमाटी फलफूल तथा तरकारी बजार विकास समितिले भदौ १३ देखि १५ गतेसम्म सो तरकारी प्रभावित नागरिकलाई पठाएको हो ।
भदौ १३ गते त्रिशूलीका लागि ५ हजार किलो हरियो तरकारी पठाइएको थियो। यसैगरी
भदौ १४ गते त्रिशूलीका लागि २ हजार ५ सय किलो सिमी, भेडे खुर्सानी, बन्दा, प्याज र आलु पठाइएको थियो। सोही दिन धादिङका लागि २ हजार ८ सय किलो हरियो तरकारी पठाइएको थियो ।
भदौ १५ गते धादिङका लागि १ हजार ३ सय किलो लौका, करेला, घिरौँला, बोडी, सिमी र फर्सी पठाइएको छ । सोही दिन धादिङका लागि थप २ हजार ५ सय किलो आलु, लौका, घिरौँला, काक्रो र टमाटर पठाइएको थियो ।
त्यसैगरी, भदौ १५ गते नै त्रिशूलीका लागि २ हजार ५ सय किलो लौका, करेला, घिरौँला, बन्दा, भण्टा लगायतका तरकारीसँगै चामल, कपडा र साबुनसमेत पठाइएको थियो ।
यसैगरी, भदौ १३ देखि १५ गतेसम्म विभिन्न चरणमा गरी जम्मा १६ हजार ६ सय किलो तरकारी तथा खाद्य एवं आवश्यक सामग्री प्रभावित क्षेत्रमा पठाइएको छ । विपद्को समयमा प्रभावित नागरिकलाई आवश्यक खाद्य सामग्रीको पहुँच सुनिश्चित गर्न स्थानीय तह, कृषक, व्यवसायी तथा सम्बन्धित निकायबीचको समन्वयलाई निरन्तरता मन्त्री चौधरीले दिनुभएको छ ।
प्रतिक्रिया दिनुहोस्