तिहार र छठ पर्वलाई लक्षित गरि १९औँ गोदावरी फूलको प्रदर्शनी

काठमाडौं कार्तिक १०, सदाझैँ यसपाली नेपालीहरुको दोस्रो ठूलो चाड २०८३को तिहार तथा छठ पर्वलाई लक्षित गर्दै ललितपुरको जावलाखेलमा १९औं गोदावरी फूलको प्रतियोगितात्मक प्रदर्शनी आयोजना हुने भएको छ । फ्लोरिकल्चर एसोसिएसन नेपाल (फ्यान)का अनुसार आगामी कात्तिक १२ देखि १६ गतेसम्म पाँच दिन सञ्चालन हुने छ ।

‘‘रोपेर फूल गोदावरी, सजाऔँ घर आँगन वरिपरि’’ भन्ने नाराका साथ जावलाखेल खेल मैदानमा प्रदर्शनी आयोजना गर्न लागिएको पत्रकार सम्मेलन गरि जानकारी दिएको हो ।
प्रदर्शनीमा ३९ हजारभन्दा बढी दर्शकले अवलोकन गर्ने अपेक्षा गरिएको छ ।
गोदावरी फूलको व्यावसायिक उत्पादन, विकास, विस्तार तथा प्रवद्र्धन गर्ने उद्देश्यले आयोजना हुन लागेको प्रदर्शनीमा कुल ८६ वटा स्टल रहनेछन् । तीमध्ये ७८ वटा व्यावसायिक, चारवटा अफिसियल, दुईवटा प्रतियोगितात्मक, एउटा प्लान्ट क्लिनिक र एउटा फोटो सेल्फी स्टल रहने छ ।

पत्रकार सम्मेलनमा फ्लोरिकल्चर एशोसिएसनका अध्यक्ष राजेशभक्त श्रेष्ठले आगामी दिनमा रैथाने फूललाई प्रवद्र्धन गर्नेगरी कार्यक्रम बनाएको बताउनु भयो । श्रेष्ठले नेपाली रैथाने फूलहरुको सम्भावना बढ्दै गरेको र वैदेशिक लगानी समेत भित्र्याउने योजना रहेको बताउनु भयो ।

प्रदर्शनीमा नेपालमै व्यावसायिक रूपमा उत्पादन गरिएका गोदावरी फूलका विभिन्न जातसँगै यस वर्ष भित्रिएका नयाँ प्रजातिसमेत राखिनेछन् । आयोजक फ्यानका अनुसार ४५० भन्दा बढी प्रकारका फूल तथा बिरुवा बिक्री र प्रदर्शनीका लागि उपलब्ध हुनेछन् । गोदावरीका अतिरिक्त तिहारमा प्रयोग हुने सयपत्री, मखमलीलगायत मौसमी फूल तथा विभिन्न आलंकारिक बोटबिरुवासमेत प्रदर्शनीमा राखिनेछन् ।
फ्लोरिकल्चरको मेला कामठमाडौं, पोखरा र इलाममा समेत यही कार्तिक १८ गते देखि प्रदर्शनीमा राखिने जनाएको छ ।
सरकारले अनुदान ऋण सहयोग गरेपनि विमाको व्यवस्था नभएको कारण केही जोखिमहरु मेलनु परेको बताउँदै फूल तथा नर्सरी व्यवसायमा लाग्ने किसानहरु कोही पनि डिप्रेसन र व्यवसाय नै छोडेर हिड्नु नपरेको बताउनु भयो ।
दुइलाख मखमली फूल निर्यात हुने र ४५ लाख सयपत्रीको माला खपत हुने बताउँदै बाँकी ५ लाख जति माला आयत गर्नु पर्ने पनि बताउनु भयो ।

गोदावरी फूलका पाँच प्रमुख विधा मिनिएचर, स्पाइडर, रिफ्लेक्स, इन्कर्भ र कट फ्लावरबीच प्रतिस्पर्धा गराइनेछ । यस वर्षदेखि कट फ्लावरतर्फ ‘उत्कृष्ट पुष्प सजावट’ विधासमेत थप गरिएको छ । प्रतियोगितामा उत्कृष्ट स्टल तथा विभिन्न विधामा प्रथम, दोस्रो र तेस्रो हुने नर्सरी र फर्मलाई सिल्ड, नगद पुरस्कार तथा प्रमाणपत्र प्रदान गरिने जनाएको छ ।

प्रदर्शनीले फूलको व्यावसायिक खेती गर्न चाहने तथा घरबगैँचा सजाउन इच्छुक व्यक्तिलाई समेत सहयोग पु¥याउने आयोजकको विश्वास छ । सहभागीले फूल तथा बिरुवाको उत्पादन, प्रविधि र व्यवस्थापनसम्बन्धी जानकारी प्राप्त गर्न सक्नेछन् ।

यसैगरी, फूल तथा बोटबिरुवामा लाग्ने रोग र कीराबारे जानकारी दिन बालीरोग विशेषज्ञसहितको प्लान्ट क्लिनिक सञ्चालन गरिनेछ । उक्त क्लिनिकबाट सर्वसाधारणले बिरुवाको स्वास्थ्य परीक्षण गराउनुका साथै आवश्यक प्राविधिक परामर्शसमेत लिन सक्नेछन् ।

प्रदर्शनी अवधिमा सामाजिक उत्तरदायित्वअन्तर्गत लायन्स क्लब अफ ग्लोबल फ्लोरिकल्चरसँगको सहकार्यमा रक्तदान कार्यक्रम पनि आयोजना गरिने आयोजकले जनाएको छ ।

तिहार तथा छठ पर्वका बेला फूलको माग बढ्ने भएकाले यस प्रदर्शनीले स्वदेशी पुष्प उत्पादनको प्रवद्र्धन, फूलको बजार विस्तार र पुष्प व्यवसायीलाई आफ्नो उत्पादन बिक्री गर्ने अवसर प्रदान गर्ने अपेक्षा गरिएको छ । साथै, नेपाली फूल तथा बिरुवाको व्यावसायिक उत्पादनलाई प्रोत्साहन गर्दै पुष्प व्यवसायको विकासमा योगदान पुग्ने विश्वास आयोजकले लिएको छ ।
प्रदर्शनीको उद्घाटन बागमती प्रदेश कृषि वन तथा वातावरण मन्त्री माननीय रमा आले मगरले गर्ने आयोजकले जनाएको छ ।

प्रदर्शनीमा १ करोड ३० लाख रुपैयाँभन्दा बढीको कारोबार गर्ने लक्ष्य राखिएको आयोजकले जनाएको छ ।